愛在公東 錫質平神父的故事【台語故事線上聽】
點閱次數：499
愛佇公東（Kong-tang）—錫質平神父的故事（台譯：陳豐惠）
1.
「噗噗噗噗……」聽著o͘-tóo-bái的聲，就知影錫神父來--矣，部落--裡逐个人攏會認得這个高chhiâng大漢的外國人。
「今仔日哪會無去學校？」錫神父問--我。
「阮兜無錢交學費。」
「你有想欲去學校--無？」
「有！」
錫神父搭我的肩胛頭講：「好，我來想辦法！」
2.
錫神父有影誠有辦法，伊說服阿爸阿母，予我去台東市區讀初中，蹛學生宿舍。錫神父有閒的時，嘛會來宿舍教阮英文和數學。
3.
就佇宿舍附近，有一棟殕（phú）色的四層樓仔。
「哇！這是全台東上懸的厝hoⁿh！」我擔頭看樓尾頂的十字架。
「遮就是錫神父創辦的公東高工啊！」我上好的朋友阿德講。
公─東─高─工！原來就佇遮啊！
4.
聽講這間學校的老師攏是錫神父對歐洲請--來--的，我真好玄（hò͘ⁿ-hiân）共阿德搝--leh倚近四層樓仔，拄好看著外國先生提家私咧kā學生示範。
『這裡……幾公分？』外國先生的華語講甲怪怪。
學生kan-nalió--一-下就應講：『嗯，大概……差不多三公分吧？』
外國先生即時嚴肅提醒：『精確！要、精、確！』
學生這時才對先生手內kā尺接--過-來，閣斟酌量--一-遍。
「足想欲佇遮上課啊！」阿德佮我決定，這就是阮欲讀的學校。
5.
經過一段時間的拍拚，阿德佮我攏考入去公東高工。
佇學校，錫神父總--是死釘釘，啥物都欲管。猶閣會記得拄開學的時，我無錢通買製圖的家私，姑不將請錫神父鬥相共，錫神父提出一套全新的家私kā我講：「這毋是欲送--你--的，你著愛想辦法kā伊趁--轉-來！」
但是，欲按怎kā趁--轉-來--leh？
6.
錫神父予我做散工（sóaⁿ-kang）的機會，予我鬥修理門窗、摒掃校園。我那哼歌那掃落葉，無注意著家己踏著草埔，阿德出力共我搝--一-下，「錫神父上討厭別人踏草埔，連鞭伊會共你揍（bok）喔！」
著呢，前幾工才看著學長刁工踏草埔，予錫神父逐咧走，我才無想欲像怹按呢予人處罰。
7.
「咚、咚、咚！」逐工透早，錫神父攏會準時挵宿舍的門，叫逐家起床。
「喔，閣來--矣！」
我目頭結結，kā棉被崁佇頭殼頂，猶毋過，錫神父一間一間挵門的聲直直傳入耳空，過無偌久，閣「咚、咚、咚」，一間一間挵倒轉--來，完全毋予阮懶屍拖沙的機會。
8.
欲睏進前，錫神父會來宿舍巡房，看阮有乖乖倒--leh--無，替阮kā被蓋予好。為欲享受錫神父的照顧，不時有人刁工kā被踢落眠床跤。
「欲睏--矣，閣佇遐咧摸飛啥！」毋知是按怎，聽著錫神父罵--人的聲，總--是予我足安心。
9.
「足癢--的啊！有夠癢--的啊！」幾个著香港跤的同學拚命抓跤，錫神父隨提出藥膏，親身替怹洗跤、抹藥仔，就敢若怹的阿爸仝款。
10.
雖然錫神父真嚴肅，阮猶是真愛kheh佇伊的細間房間，看伊收集的郵票，摸伊的薰吹。
錫神父嘛會準備跳棋、khe-chí-báng予阮耍，但是逐家攏無想欲予錫神父加入，因為只要伊輸--矣，就會開始檢討家己，實在真袂消暢。
11
其實，佮郵票、薰吹比phēng，阮閣較想欲騎錫神父彼台足奅（phāⁿ）的o͘-tó͘-bái。
有一暗，我搝阿德偷偷仔騎錫神父的o͘-tó͘-bái出去耍，無想到煞犁田。
錫神父知影了後雖然足受氣，煞無罵--阮，kan-na足煩惱問講：「有按怎--無？敢有著傷？」
12.
日時仔佇實習工場學技術，暗時佇教室上課，按呢的生活其實誠硬篤（ngē-táu），煞予阮有能力參加全國性的技能競賽，甚至閣通出國比賽。
這陣，得著國際技能競賽金牌的阮，當佇咧街路遊行呢！當隊伍轉去到學校的時，我遠遠看著錫神父咧等--阮，我心情激動行向錫神父，想袂到，伊煞先衝--過-來！
13.
「你踏著草埔--矣--啦！」
阿德搶代先共我搝--leh，我才注意著家己踏著草埔；為著無愛承拳頭拇，阮越頭緊走。
噯呀～錫神父，請先看我手--裡的獎牌--一-下--啦！後擺，我袂閣再踏草埔--矣--啦！