來去福爾摩沙 蘭大衛醫生的故事【台語故事線上聽】
點閱次數：1774
蘭大衛醫生結束一工的義診，和厝內人來到珊瑚礁岸邊，浸佇清涼的海水--裡……
「大衛，講你囡仔時代佇蘇格蘭的生活予我聽！」
我佮意佇種滿仙人草佮羊齒植物的房間，欣賞動物標本佮化石。
「彼是啥物所在啊？」
是阿爸的冊房。
「哇～哪有這寡收藏？」
阿爸出去散步的時，橐袋仔一定貯摃槌仔佮譀鏡，沿路觀察生態、採集標本。
「恁老爸敢是……生物學家？」
伊是牧師。
「足特別的牧師呢！」
阮阿公嘛是牧師，怹教會的工課雖然蓋無閒，毋過猶原拚勢咧追求智識，一世人發現七十類新品種的生物。
「爸仔囝興趣相倚呢。」
怹足濟所在欲仝仔欲仝，大學攏是讀文學佮神學、名攏號做蘭大衛。
「閣加你，按呢就有三个蘭大衛呢！」
阮家鄉有一條路，叫「蘭大衛路」，就是為著紀念阿爸。
「阿爸遮受人敬疼，做囝兒序細的有啥物感覺？」
淡薄仔辛苦……愛比其他的囡仔較乖。出差錯的時陣，定定就會予人剾洗：「大衛，你是牧師的囡仔呢。」
禮拜是安歇日，閣較是嚴肅的日子。工人毋敢送牛奶來阮兜，因為阿爸講：「聖經記載，安歇日袂使作穡。」
工人只好將阮兜的牛奶，囥佇厝邊的牆仔頂，拜託阮偷偷仔去提。
安歇日這工，我著愛出席早起禮拜、下晡禮拜，閣有聖經課程。
暗時仔，阿爸會對今仔日的講道--裡，出題目考--我。
「應袂出來會按怎？」
佳哉伊定定測驗到一半就睏--去矣，我就趁機會緊落跑。
「呵呵，恁父仔囝這點有夠成，聽講你教學生的時毋但會睏--去，而且是徛咧睏，敢有影？」
為著培養本地的醫療人才，我利用暗時教少年家化學、解剖學、生理學。毋過，日--時求診的患者一个接一个，我實在傷忝矣，到教學的時陣，早就無氣力矣，學生講我的面色比病人較白屍。
因為徛咧嘛會睏--去，所以我想著一个保持清醒的方法：用孤跤徛--咧，另外一跤架（khuè）咧椅仔頂。
「呵呵呵，當年大衛牧師應該愛學你這招才著。」
我捌有按呢的想法，「啥物時陣，會使莫閣參加規工的安歇日聚會咧？」
「按呢，這个無奈的少年人，是按怎變成我面頭前的宣教師呢？」
是因為巴伯修。
「巴伯修醫生？」
無毋著。有一工，我和伊坐佇草埔仔咧開講，巴伯修講著主耶穌對門徒的吩咐，愛走遍天邊海角育飼主的羊仔，伊講話的時陣，目睭金鑠鑠，比天頂上光的星閣較顯目。彼當時，我心內感覺足煞心的，我嘛想欲閣加認捌上主的話語、我想欲行這條路……。
「你敢有想過欲做牧師？」
有，毋過，中學上尾一年，我積極參與戶外佈道，對聽眾的反應，我知影，家己並無講道的才能。我決定先進入大學讀文學，不過，阿爸無隨同意。
「為啥物呢？」
厝--裡人口那來那濟，成做九个人的家庭，阿爸的薪水閣袂振袂動，而且規家伙仔干焦靠阿爸一份收入咧活。
「後來呢？」
佳哉，阿姨歡喜提供我食佮蹛。其他的費用，阿爸就有能力負擔--矣。
入學了後，我跳級讀大學四年的希臘文佮拉丁文，閣提早一年畢業。
「你後--來哪會對古典文學，轉去學醫學呢？」
因為，佇提著文學碩士進前，成做醫療宣教師的念頭，已經佇我心內釘根--矣。
「讀醫學院的開銷閣較驚--人呢？」
是，所以我參加物理競賽提獎金，嘛得著醫療宣道會的獎學金。而且，我去稅一間無燒水的房間，厝稅省袂少。
「無燒水？敢講你洗五冬的冷水？」
是。
成做醫生了後，巴伯修邀請我去Formosa中部做醫療宣教師；仝一个時間，米勒醫生也邀請我去皇家附設病院做外科醫師，兩个提議我攏誠有興趣，一个會使實現夢想，另外一个會使學習閣較濟開刀的技術。
「最後，你為啥物會選擇Formosa呢？」
也是因為巴伯修。
伊講情況緊急，進前派去Formosa中部的醫療宣教師過身矣，當地隨需要跤手。
伊叫我莫煩惱外科經驗無夠，佇Formosa南部的醫生會使共我指導。所以，幾個月後，我就坐上往Formosa的船。
「拄到Formosa的時陣，啥物代誌予你上頭疼？」
上頭疼的就是台語。「kâu」佮「káu」，佗一个是狗、佗一个是猴啊？每一个字有七个聲調，聲調一變，意思嘛變。
「你嘛予寒熱仔佮做痢折磨甲足忝的乎？」
是啊，又閣吐又閣落，一時仔寒一時仔熱。
「閣有氣候檢采嘛誠僫適應？」
嗯，五月的彰化，濕閣熱，𤲍（kheh）滿患者的病院，熱翕翕。
「特別是跤爛--去的患者出現的時，濕閣熱的空氣內底滿滿攏是臭味。」
你講的是當地人號做臭跤的患者。
「彼種患者一入來診間，其他的人攏走若飛咧，你顛倒是共患者的跤攑起來鼻。」
因為空喙的氣味會使幫助我評估患者恢復的狀況。
「真無簡單！」
我希望醫生館會當擴建，按呢就會使接納閣較濟患者。
「是啊，才袂閣發生患者傷濟共壁硩崩--去的事件。彼工壁崩--落來的時陣，診間有幾秒鐘規个攏恬tsuh-tsuh。」
逐家可能予我的淒慘落魄驚--著矣。
「看著你予壁輾--落來掔--著、流血，患者大概掠做欲予人罵矣，想袂到你干焦講：『以後愛細膩。』你的個性實在真溫柔！」
阮阿母的個性影響我誠深。
「誠想欲見伊一面，可惜結婚的時，伊已經過身矣。」
阿母為著規家伙仔食飽穿燒，日子過著真硬篤，但是，伊予厝內人十足的關愛，逐工攏為每一个囝兒序細咧祈禱。
「大衛牧師呢？」
阿爸相對來講就真嚴厲。
有一工透早，伊氣我趖跤趖手，就共手--裡當咧讀的冊，對我身軀擲--過來。
「哇啊──」
不過，欲暗仔，阿爸請我佮伊同齊跪落來祈禱，伊為著家己的行為感覺真見笑，祈求主的原諒。
「大衛牧師嘛有一粒溫柔的心呢！」
若阿爸嘛有來Formosa，一定真驚喜，當年伊蒐集的仙人草、羊齒植物會使佇野外生湠，伊房間內的標本佇遮全部攏活起來矣。
「上驚喜--的，應該是看著家族--裡第四个大衛出世！聽你講往事真趣味。斟酌共想，快樂的代誌、痛苦的代誌，攏親像掀冊仝款，phah、phah、phah就過去矣。」
有上主做咱的𤆬路人，未來的路，咱會當閣較勇敢來行！
「是啊，按呢咱來去囉！後一項穡頭閣欲開始囉！」