徐賓諾與紀歐惠愛的超能力【台語故事線上聽】
點閱次數：686放學了後轉到家，我喝講：「阿爸，阿爸，同學來咱兜耍喔！」
同學看著阿爸的時，攏大聲喝：「伊是恁阿爸喔？」
無毋著，阮阿爸號做「徐賓諾」，是對挪威來的護理師。
古早，護理師大部份是查某人咧做的，煞是阿爸的第一志願。
阿爸講，伊毋但共患者注射、換藥仔，患者嘛會共心內的艱苦共伊講，所以阿爸嘛替怹祈禱，予怹身體和心內的病疼攏受醫治。
阿爸閣講，有濟濟人需要醫治，所以伊共上帝講：「佗位有需要--我，我就去！」
當初阿爸來台灣的時，我因為偷提pháng予人關佇台北監獄，遐的環境真䆀，我和同伴攏著疥瘡（kòe-chhng），規身軀癢甲睏袂去。阿爸來監獄消毒環境的時看--著，伊那曝棉被那和身軀邊的人講：「遮的囡仔需要的毋是監獄，是一个家庭。」
家庭？
我若有家庭，我的爸母猶佇咧，我就袂佮殺人犯關做伙矣。想袂到，佇我和同伴出獄的彼一工，伊來接阮「轉去厝」；雖然伊猶未結婚生囝，但是阮攏叫伊——阿爸。
有一工，阿爸接著一个真重要的任務，愛搬去埔里。因為遐的原住民蹛佇交通真無方便的山區，生活真艱苦，衛生條件足䆀；佇遐有身的婦人人、嬰仔佮著大病的人無醫護人員照顧。自從埔里基督教病院開始免費治療原住民的消息傳--開了後，候診室逐工都齊是對山頂落來的患者，阿爸需要去鬥跤手。
病院跤手有影足無夠額，所以阮嘛定定予人叫去鬥摒掃、扛患者。
阿爸除了愛處理病院的事務，共患者注射、換藥仔，有時著閣修理病床、便所、窗仔門……伊啥物都會曉，啥物都做，真正足成萬能的超人——會當共任何代誌做予好！
毋過，看著阿爸足忝的身影，逐工暗時欲睏進前，我攏會共上帝祈禱：「萬能超人照顧所有的人，拜託上帝派一个天使來照顧--伊，好--無？」
「阿爸，阿爸！」放學了後我冊揹仔囥咧，趕緊問阿爸：「聽講病院發生一件特別的代誌？」
「有一位婦人人難產需要緊急開刀、輸血，一位外國查某醫生隨pih手ńg，輸血予彼位產婦，閣入去開刀房共伊手術！這位真猛掠（mé-lia̍h），像熾爁（sih-nà）女超人的醫生是誰啊？」
阿爸講：「彼位查某醫生號做紀歐惠，嘛是挪威人，伊是專工對美國來教麻醉技術和鬥開刀的新醫生。」
「咦？伊和阿爸攏是挪威人；伊是醫生、阿爸是護理師；伊是熾爁女超人，阿爸是萬能超人，這項代誌足神奇……嘿！敢講是上帝聽著我的祈禱？」我直直想。
以早，歇睏的時，我總是看著阿爸孤一人佇病院的花園--裡，恬恬共花草樹木沃水。這陣阿爸身軀邊加紀醫生，怹會做伙講笑。
閣較趣味的是，怹足愛共花草樹木號名，閣會那沃水那喝：「碧玉、蓋爾、安妮塔……」直直講袂煞。無了解的人會掠準講有一陣囡仔綴怹佇花園內底耍呢！
紀醫生決定放拺美國時行的跑車和四序的生活，留佇埔里。
足讚的！阮阿爸欲結婚矣！
我歡喜甲睏袂去，跪佇眠床邊共上帝講：「感謝上帝！今阿爸有某矣，阮有阿母矣，原住民有醫生矣，實在太完美的啦！」
有熾爁女超人的加入，病院變甲閣較強大!
阿母除了治病、麻醉佮開刀，閣協助阿爸培育原住民護理師、成立天使捐血隊，予閣較濟有身的婦人人佮嬰仔有活命，予原住民的身體變甲閣較勇健。
佇台灣小兒麻痺症大流行的時，濟濟干焦會當佇塗跤爬的囡仔，嘛予我的阿爸阿母接去病院的家照顧，阮的厝內人愈來愈濟矣。
濟濟年後，阮遮的囡仔嘛攏做阿爸阿母，啊兩位超人嘛升起來做阿公阿媽。雖然已經退休，怹猶原不時佇病房行踏、關心患者。
怹巡房的時，患者上捷問的問題就是：「恁會轉去挪威蹛無？」
「只要遮有需要，阮就會一直留佇台灣繼續做工。」阿公講。
阿媽講：「挪威是阮的祖國，但是台灣是阮的徛家。」
毋過，有一年怹轉去挪威探親，阿媽的身體因為破病傷虛荏（siuⁿhi-lám），袂當閣坐長途的飛機，怹只好留佇故鄉。但是，怹的心一直攏佇埔里基督教病院！
怹總是會寫批來，數念這陣厝內人、患者，甚至是埕--裡的花草樹木……
「有人共『碧玉』修剪頭毛無？」
「『蓋爾』應該有閣較勇壯hoⁿh？」
聽著遮的請安的話，總是會忍袂牢想起怹手牽手佇花園散步，彼是阮上數念的身影啊！