井上先生，感謝您【台語故事線上聽（含故事文）】
點閱次數：1973「總算hō͘我揣著你--ah，井上先生。」
我kā Yaki央我紮--來ê禮物絚絚捏tī手--裡，激動甲一句話都講袂出喙。這个禮物貯--ê是原住民部落遐ê老大人對井上先生深深ê思念。
看著井上伊之助先生ê墓牌頂有刻一个大大ê「愛」--字，我知影，原來毋但（m̄-nā）部落遐ê老大人思念井上先生，井上先生mā仝款思念tī台灣ê一切。
墓牌頂懸一句台灣泰雅族語「上帝咧編織」，更加hō͘我想起chiok久以前台灣山內發生ê代誌。
Chiok濟年前我拄到山地部落做醫生ê時，便若有閒就真愛坐tī Yaki身邊看伊織布，泰雅族ê編織是真正美麗。
Yaki會kā規排染做五花十色ê線，照心內ê想法安排好勢，成做直線（ti̍t-sòaⁿ）。然後kā橫線（hoâiⁿ-sòaⁿ）ùi正手、倒手兩爿來回穿入去了後，koh用bgira'出力捒hō͘絚，發出優雅ê「kih-lih！tong！tong！」ê聲。
Yutas有時會來揣Yaki開講，兩个老人總是會提起日本時代ùi日本來醫療服務ê井上先生，hō͘我對這位醫生充滿好玄（hòⁿ-hiân）。
「井上先生ê老爸是tī台灣hō͘人刣--死--ê。」有一工Yutas án-ne kā我講。
我真驚疑，擋袂牢就kā問：「按呢伊kám是來台灣報仇--ê？」
Yutas幌頭，淡薄仔傷心講，井上先生逐擺看著樟仔就會想起伊阿爸，伊會ná摸樹身ná講：「若是台灣無樟仔，阿爸就袂來台灣做工課，mā袂kap原住民發生誤會來失去性命。我也袂因為想beh教化、改變遮ê原住民來台灣傳福音--ah，這一切lóng是上帝安排好--ê啊！」
「聽--起-來，井上先生並m̄是為著怨恨來遮--ê？」我擋袂牢koh問--落-去。
Yutas講：「是啊，雖然井上先生無啥愛講話，看--起-來小可仔嚴肅，m̄-koh心真溫柔，tī伊身--上根本揣無怨恨ê痕跡。」
紲--落-來koh真認真kā我講：「井上先生原本希望tī山地部落傳福音，soahhō͘日本政府禁止，m̄-koh伊並無放棄，決定學習醫術，改用醫療ê方式進入台灣山區。便若聽著有部落族人破病，m̄管山路偌爾仔危險歹行，伊lóng會盤過山去救治。井上先生bat講--過，伊úi上帝得著無比（bû-pí）ê愛，伊希望家己ê性命會當蠟條仝款，hō͘愛ê火燒盡。」
「井上先生拄著遐爾悲傷ê代誌，soahiáu會當按呢做，真正hō͘人想袂曉啊！」我手托咧下頦，認真想beh舞hō͘了解，然後問Yutas：「按呢你是按怎拄著伊--ê--咧？」
Yutas笑笑仔講：「彼是有一年冬天，部落真濟人染著流行性感冒，當時我無衫kap被通保暖，井上先生毋但治好我ê病，koh送一領siah-chuhhō͘--我。M̄-koh我甘願身軀冷也m̄甘穿chiah珍貴ê衫，因為感覺家己規身軀癩哥爛癆！
井上先生知影了後袂忍--得就kā我罵講：『是性命重要，抑是衫重要？』
講了koh送一寡豬肉ài我補身體。」
我ùi Yutas ê面，看著伊對井上先生ê尊敬，m̄-koh面--裡koh帶一絲仔m̄甘。
伊講井上先生tī山地部落巡迴醫療真無簡單，風颱大雨kā開chiok久ê時間kap錢起--ê醫療所沖歹--去，用來治病ê器材藥品也lónghō͘大水沖走。甚至，伊三个囡仔tī八年之間一个koh一个過身--去，伊心內受著真大ê折磨kap痛苦，soahkoh堅持beh留踮台灣ê山內服務。
Yutas koh講：「井上先生真正是一个特別ê人，為著beh和阮順利溝通，伊真認真學習原住民講ê話，適應山內ê生活。因為長時間做伙，伊發見原住民其實誠單純，有活力，而且袂貪心koh誠分張，koh是真注重婚姻kap男女平等ê高貴民族！這毋但改變伊原本想beh教育原住民ê想法，koh tī廣播kap報紙頂頭提倡廢止「生蕃」抑「蕃人」這種看原住民無目地ê稱呼。」講到遮，Yutas mā敬佩甲kā比一个讚。
「就是因為án-ne ê轉變，井上先生後--來便若聽著原住民有困難，伊就一定會想辦法幫贊。」tī邊仔安靜織布ê Yaki聽著Yutas所講ê話，mā無koh恬恬。
Yaki kā手--裡ê線囥--咧，講：「井上先生bat tī轉去日本辦代誌ê時，聽講有兩个泰雅族ê查某囡仔hō͘人留tī東京，無錢也m̄知轉--去ê路，就真著急咧揣--怹，像咧揣家己拍m̄見ê囡仔仝款；後--來毋但揣--著，koh想辦法傱錢，hō͘怹會當順利轉--來台灣。」
講啊講，Yaki就目箍紅紅，目屎含目墘講：「我khah早咧生囝ê時，因為大流血，強beh死死昏昏--去，mā是受當tī咧部落為逐家治病ê井上先生細膩照顧，才保我這條命。等到身體恢復了後，井上先生koh倩我鬥照顧其他患者，hō͘我趁有夠錢來養飼我ê囡仔。」
「原來井上先生毋但醫治部落族人ê身體，koh真關照怹ê生活。」我對井上先生真正愈來愈欽佩--ah。
M̄-koh，我雄雄想起一件代誌。「按呢井上先生kám有實現伊想beh傳福音ê願望？」我問。
「井上先生bat tī一个祈禱會中講--著，伊想beh傳福音hō͘台灣原住民，soah因為日本政府禁止，致使無一个人信主，ná講就感覺艱苦心開聲哭--出-來，可見這是伊來台灣上遺憾ê代誌--ah。」Yaki講，其實原住民只是為著莫影響井上先生ê工課，無公開承認怹信耶穌爾爾。
「井上先生後--來kám有轉去日本？」我問。
Yutas講，戰爭結束後，井上先生規心kan-na想beh留踮部落，繼續醫療傳道ê工課，koh kā名改做漢名「高天命」，想beh做台灣人，m̄-koh猶是無法度留--落-來，最後被迫離開台灣。M̄-koh，tī拄beh離開進前，伊聽著有真濟Taroko（太魯閣）ê原住民到花蓮港教會接受洗禮，當場感動kah講袂出話。
「凡勢有人無理解井上先生tī台灣所做ê代誌，事實上，伊是用性命咧傳福音，用基督ê愛咧影響阮ê性命。就tī伊離開台灣了後，誠濟原住民變做基督徒，只是伊無機會親目睭看著爾爾，這lóng是井上先生濟濟年來祈禱kap醫療工作ê成果啊！」Yaki愈講愈激動。
過一睏仔，Yaki平靜--落-來，寬寬仔講：
「我真正chiok數念井上先生，
M̄知伊ê墓tī佗位--咧？
我想beh𤆬我ê囡仔去看--伊，
親身kohkā伊說謝。」
彼工結束kap兩位老大人ê談話，beh走進前我對Yaki講：「我來kā你鬥揣井上先生！無論開偌濟時間，我lóng beh揣著伊。」
伊頕頭微微仔笑，然後ùi一个盒仔內，提出一項物件hō͘--我，
是一个用織布紩（thīⁿ）ê目鏡袋仔。
幾年後，Yaki轉去到天爸ê兜。
Tī櫻花大開ê季節，我總算來到井上先生ê墓前。回想伊用有限ê性命一世人為台灣所做ê一切，親像泰雅族ê編織，上帝安排好美麗ê直線，井上先生用性命中每一擺ê經歷kap撞突，hō͘bgira'出力捒絚，最後完成一幅無人會當取代ê織布。
徛tī井上先生墓牌前，我獻上泰雅族Yaki手織ê目鏡袋仔，內心充滿感謝。
我對伊講：「井上先生，感謝--你。感謝你將這世人lóng奉獻tī台灣這塊土地。」
美好腳蹤系列06
井上先生，謝謝您
文/圖：陳嘉鈴
發行：台灣基督長老教會總會教育委員會
發行人：王燦昇
出版：使徒出版社有限公司
總策畫：盧俊義
顧問：張淑瓊
編輯小組：張淑瓊、李位鼎、江淑文、陳嘉鈴、張倍萁
主編：江淑文
親子導讀：江淑文
親子旅遊：周佩蓉、陳嘉鈴
美術編輯：陳嘉鈴
執行編輯：張倍萁
翻譯：台語文/陳豐惠；英文/James Chen；日文/Fumi Wörl（陳寬墀校正）
校稿：林士文、周佩蓉、潘昭樺、黃嘉琳、蕭景宗
有聲書：華語/陳謙光、陳初保、林士文；台語/陳豐惠；英語/James Chen；日本語/重金優子
錄音製作：陳謙光；拉法錄音室/陳偉益
音樂原創和演奏：陳謙光；拉法錄音室/陳偉益
數位錄音工程和配樂配音指導：高珮文
印刷製版：國宣印刷股份有限公司
發行地址：台北市羅斯福路三段269巷3號
訂購電話：（02）2362-5282轉215、218發行室
傳真：（02）2363-1722
網址：http://christed.pct.org.tw
電子信箱：christed@mail.pct.org.tw
劃撥戶名：使徒出版社有限公司
劃撥帳號：50066252
出版年月：主後2018年7月
ISBN：978-986-95789-7-4
定價：250元（精裝附英文譯本）；日文譯本自由奉獻