一起在畫裡 廖繼春的故事【台語故事線上聽】
點閱次數：975做伙佇圖裡 廖繼春的故事
「廖繼春的圖入選啦！」
巷仔內傳來逐家熱烈的祝賀聲。
坐佇角仔的廖繼春完全無聽著in的聲，
伊手裡的畫筆振動無煞，日頭透過弓蕉樹掖落來的光影予伊盯目（tèⁿ-ba̍k）。
細漢時，廖繼春足愛恬靜佇阿母身邊，看伊用各種色緻的線刺繡，刺出美麗多樣的花鳥圖。遮的圖佇伊目睭內若像活起來，伊想欲共in畫出來，但是無筆和紙是欲按怎咧？
「來買好食的油炸粿喔！」
廖繼春偝姪仔沿路喝賣，伊想講－閣加賣寡油炸粿，就有錢通買鉛筆，佇舊數簿空白的所在畫圖矣。
廖繼春讀台北師範學校的時，聽講有一種號做「油畫」的畫法，伊足有興趣，就家己試用油漆佇紙枋頂練習畫。
一直到佇公園看著有人用油畫色料佇畫布頂面寫生，伊才雄雄覺悟：「原來這才是真正的油畫啊！」自按呢伊決定將來一定欲學油畫。
當青春的伊，除了愛畫油畫，嘛愛著一位氣質和個性足好的查某囡仔——林瓊仙。廖繼春想欲娶伊做牽手，林瓊仙雖然有答應，煞提出一个要求，愛廖繼春去日本留學。
林瓊仙為廖繼春買座位足好勢的船票，予伊通有輕鬆的心情去到日本。廖繼春嘛順利考牢東京美術學校。當伊逐個月收著林瓊仙寄來的生活費的時，伊共家己講－愛拍拚專心學畫圖，冗早轉去到台灣。
和廖繼春仝時入去東京美術學校的，猶有平平台灣人的陳澄波。
「雖然先生嚴格要求寫實、光和影的概念，但是伊攏袂限制咱愛按怎畫圖呢！」廖繼春真歡喜按呢講。
「是啊！按呢真自由畫圖真有意思，咱嘛著愛較拍拚一下，袂當輸日本人啊！」陳澄波講。
看陳澄波光爍爍的眼神，廖繼春微微仔笑回應。干焦佮陳澄波做伙的時，才會當予平常時恬靜的廖繼春直直講話，足快樂開講畫圖的沓沓滴滴，兩人自按呢成做好朋友。
畢業後轉到台灣的廖繼春，開始教學生畫圖，同時伊的油畫創作相連紲著獎，閣和濟濟畫友做伙拍拚推行新美術運動，希望提升台灣民眾對美術的感受。
有一擺伊和畫家梅原龍三郎鬥陣去寫生。
唰，唰，唰！
看著梅原先生用豪邁的筆觸佇畫布頂面行徙，火紅的色緻，敢若點著（to̍h）廖繼春對奔放（phun-hòng）表現畫法的熱情。
二戰結束了後，戰敗的日本人一陣一陣回國，社會混亂，
定有賊仔出現，欲強佔日本人留落來的房舍。
「行！較緊咧！和阿爸做伙去貼字條。」短期代理校長的廖繼春，𤆬後生衝出去，共校舍一一貼上校產字條。
佇遐爾緊張亂操操的時，廖繼春干焦想著愛保全校產，in規家伙煞猶是選擇蹛佇狹櫼櫼的低厝仔內底。
紲落，不幸的代誌發生矣，好朋友陳澄波佇二二八事件，無辜予人刣--死過身矣。
原本就無話無句的廖繼春，變甲閣較恬靜矣。
有一段時間，伊不時去和陳澄波做伙寫生的所在，懷念伊的好朋友。
佇上蓋消沉的時刻，因為信仰的安慰佮鼓勵，廖繼春才重新有畫圖的動力，閣共彼份懷念，暗藏佇圖裡。
轉到省立師範學院教畫圖的廖繼春，認真教學，伊畫圖的才能閣較受著逐家的推崇，學生攏搶欲愛上伊的課。
「老師袂要求阮學伊的圖，真少修阮的圖，閣愛阮揣出家己的風格。」
廖繼春自由開放的教學方法，猶閣有鼓勵學生成立畫會，帶動規个台灣的現代藝術風潮。
定行佇時代上頭前的廖繼春嘛沓沓仔試畫一寡抽象的圖，共伊真實的心情，畫佇圖裡表達。
「先生今仔日閣會畫出啥物料想袂到的作品咧？」學生逐不時會足期待咧熱烈議論。
有寡學生定定來廖繼春厝裡聚會，討論美術理念。
「恁就來阮兜蹛啦！」林瓊仙對生活有困難的學生講，佇邊仔的廖繼春嘛現出溫暖的笑容。
但是，廖繼春定畫到袂記得時間，嘛袂記得徛佇邊仔的學生需要食飯。
「嗯，按呢猶袂䆀。」廖繼春看畫布，真滿意共家己講。
「按呢袂用得啦！畫按呢的圖，別人看無！」林瓊仙徛佇後壁講話矣。
廖繼春共看一下，微微仔笑，然後畫看起來成閣敢若無啥成的圖，嘛有共林瓊仙的關心，加減摻佇伊的圖裡。
廖繼春捌去國外參觀美術館，予伊的視野大大開闊起來。
轉到台灣了後所創作的圖，框殼閣較自由，色彩嘛閣較大膽豔麗。伊對畫圖有閣較深的體會：「我感覺畫了有成抑無成並無重要，重要的是內容，會當予人感受著媠，有若像禮拜日寧靜、祥和的氣氛。」
定定畫親人和厝內景色的廖繼春，佇老歲的時創作一幅圖。
畫面中，各種鳥獸蟲豸佇暝時的樹林中歇睏，充滿祥和的氣氛。算看覓，圖裡有幾隻動物和蟲豸咧？
「乖囝，佇阿爸的圖裡，阿爸永遠攏佮恁佇咧。」廖繼春講。
就按呢，廖繼春的圖一直真溫暖共伊的囡仔守護牢咧，嘛引綴伊做伙熱愛藝術的人。
「我真頇顢講話，我用圖來講我的話，圖，對我來講，比啥物攏較通表達我的心情。」——廖繼春