用生命回應呼召的 李庥【台語故事線上聽】
點閱次數：925用性命回應呼召的李庥
「自細漢我上大的志向就是：佇無聽過恩主的所在傳道理。」
—李庥
1867年7月，李庥牧師佮牽手Eliza起去一隻足大足大的船。
港口白殕白殕（phú）的薄霧--裡，李庥和Eliza的阿爸阿母、兄弟姊妹、教會會友、主日學學生、同學、老師，甚至厝邊、麭（pháng）店頭家和一寡完全無熟似的生份人，攏來送--，逐家攏哭矣！
李庥和Eliza大力擛手相辭，一直到岸頂的一切攏變甲足細足細。
兩禮拜前，遮的人拄來參加過的婚禮。猶會記得佇結婚典禮的時，人客嗤舞嗤呲咧討論：
「這對新人有夠特別的，敢共遺書準備好矣？」
「遺書？彼敢毋是過身的人留落來的批？」
「是啊！隨就欲出發，一路經過大西洋、印度洋和太平洋，佇中國廈門轉坐兩光的細隻船。若好運，五個月後，就會得到目的地—台灣。」
「聽講頂一个派去台灣的宣教師去予海湧捲--去呢！」
佇李庥的心內，台灣是⋯⋯
寒--人無落雪，青葉袂雄雄變紅。
山足懸足懸，水嶄然掣流。
熱--人閣翕（hip）閣熱，蠓蟲規陣。
透風落雨，四界淹水。
竹林仔--裡，有藏會出草的人；
無論都市庄跤，鴉片、廟寺、筊仙、土匪，
是四常看會著的。
但是佇遐，嘛有真濟人想欲認捌
馬雅各的上帝。
五個月後，李庥和Eliza來到台灣。
馬雅各共兩个大力攬絚絚，伊感覺足意外，講：
「哇！Eliza有身五個月矣hoⁿh？」
「馬雅各，你有影厲害，眼--一下就知矣！」李庥笑笑回答。
馬雅各醫生家己一个佇島上工作年外。伊看起來躼閣皮膚白，靠神奇的手術、藥物和奇妙的祈禱，予濟濟人對伊的上帝感覺好玄（hòⁿ-hiân）。
「這个神無仝，伊為咱來死。」
「神會死？」
「毋是啦，唉呀，你袂了解啦！」
完全毋捌的人佮略仔（lio̍h-á）捌的人聚集佇醫生館辯論，有時強強欲拍起來！馬雅各心內想：若有一位牧師來解說遮的僫了解的代誌，毋知欲偌好--leh！
就按呢，李庥夫婦無惜路頭遠，搬搬搖搖來到台灣。
李庥發現，濟濟人佇厝內拜各種神像，希望神明保庇發大財、趁大錢，同時閣驚虧待祖先會拄著災厄。但是，李庥想欲共講，上帝毋是有求必應的神仙，嘛毋是會共人咒讖的神明。
上帝予人勇氣，袂驚惶；上帝予人疼心，互相照顧；上帝予人智慧，揣著藥方（io̍h-hng），免迷信；上帝予人食穿夠額，袂siuⁿ濟嘛袂siuⁿ少，拄拄好。
信徒當中，有澎湖來的青年、臭名眾人知的筊仙、聰明機巧（ki-khiáu）的秀才，嘛有重病虛荏的阿婆。有的人勇敢閣拍拚，有的直直陷落佇毒品和罪惡，有的是歹心行（sim-hēng）。
李庥斟酌觀察每一个人，共教導、訓練。逐个想欲加入教會、想欲受洗禮抑是想欲成做助手的人攏著愛知，跟綴（kin-tòe）耶穌，毋是簡單的代誌。
1872年一--月，李庥和Eliza期待足久的另外一位牧師－馬偕－總算來到台灣。李庥𤆬伊參觀醫生館和宣道站。
兩个鬍鬚--的佇庄跤路仔行，庄--裡的少年人互相使目箭，hi-hi-hōa-hōa講：
「番仔！」「猴山仔！」「喂！恁阿公來矣啦！」
「聽有--無？」李庥問。
「當然嘛聽有啊！咧笑咱！」馬偕規个面紅記記，有淡薄仔受氣。
李庥講起一段細漢時的故事：有一个非洲人行入伊讀冊的庄頭，伊和𨑨迌伴竟然做伙笑這个烏人！大漢了後，見擺想起這層代誌，就感覺足見笑。
「馬偕，你以早嘛捌是孽潲（gia̍t-siâu）的囡仔hoⁿh！」李庥講。
馬偕想想咧，氣就消矣。
彼年的春天恬恬仔來到，大地佇雷聲中轉燒烙（sio-lō）。李庥、馬偕和德馬太醫生坐船上北到淡水，參觀馬偕未來欲蹛的所在。
離開淡水了後，三个阿啄仔佮一陣蹛佇深山林內的原住民，做伙步輦（pō͘-lián）落南。日頭寬寬仔沉落山谷，婦人人真靈巧掠規籠的魚，查埔人是掠著一隻鹿仔，燃炎帕帕的火，佇山林內煮暗頓。
暗暝，三个人睏佇地面，營火共圍--leh，厚煙遮蓋有星的天頂。原住民大聲笑鬧，āng聲唱歌。雲豹和烏熊佇樹林內徘徊，群山之間不時有夜鶯咧啼叫。
李庥睏袂去，伊聽無遐的腰間掛利刀（lāi-to）的查埔人咧討論啥物，伊干焦知影－濟濟原住民族猶是有共異族鏨頭（chām-thâu）的習慣。
「我雖然行過死蔭的山谷，也毋驚災害，因為你佮我同在……」
李庥喙--裡唸詩篇23篇，目睭輕輕仔𤲍--起來。
隔轉工，來到一片（phiàn）平洋。溪流迵過山谷，遐有幾若百隻鹿仔。四箍輾轉有滿滿的桃仔、李仔和各種果子樹，散發迷人的芳氣。
山內的住民，因為接受馬雅各醫生的治療來認捌上帝。這段期間，李庥訓練的傳道師嘛來到的庄頭，教逐家聚會、讀聖經、祈禱。
李庥聽每一个想欲受洗禮的人講故事，了解耶穌按怎進入的性命，接紲為行洗禮。
轉到打狗，李庥和Eliza繼續佇主日學教囡仔讀冊、學習聖經和科學。
有一工，李庥發現有一家伙的壁頂貼一張太陽系的圖，原來是學生為著欲共阿母解說行星（hêng-chheⁿ）按怎踅日頭畫的。這个阿母聽捌了後，就定定佮囡仔圍纍佇圖的頭前，呵咾創造宇宙的上帝，開始認字讀經，嘛教兩个查某囝讀冊。
1873年六--月，李庥和Eliza的細漢後生Robert過身矣。三歲半的伊，毋捌開喙講話。
Robert袂曉講話，定定予李庥夫婦煩惱，想欲送Robert轉去歐洲揣人幫贊，煞放袂落台灣的工課。無想到講一場病症就按呢共𤆬走。
「這个傷疼透濫憐憫。」李庥佇批--裡按呢寫。
翻轉年，大漢後生William嘛染病矣，Eliza趕緊𤆬伊轉去英國靜養。李庥佇中國廈門送上船了後，孤一人轉去到台灣，繼續作穡。
1875年三--月，李庥對打狗起行，開始東部的旅行。伊坐的船仔細隻閣兩光，風湧若大，就愛覕入去峽灣，開14工才到台東的寶桑。
迎接李庥的是頭目的牽手和一陣婦人人。佇這个部落--裡，查某人「娶」心愛的查埔人轉去厝，財產嘛是由查某囝繼承。李庥為族人洗目睭、抹藥膏、包紮，閣透過翻譯，傳講耶穌的故事。
這逝（chōa）旅程結束了後，李庥訓練的傳道師來到台東徛起，接紲伊的工課。
1877年底，Eliza轉來到台灣，
共干焦十歲的William孤一人留佇家鄉。
後生無佇身軀邊，Eliza就綴李庥做伙深入毋捌探索--過的深山部落。發現－濟濟年前教--過的平埔族婦女和教會助手，已經來到遮的山區傳福音矣！
這時的李庥和Eliza開始籌備男學校和女學校。知影－台灣人會教台灣人，真理的火已經點著（to̍h）矣！
1879年九--月，李庥佇夯無歇的熱病當中離開世間。
39歲的伊，總算通歇睏矣！
打狗山跤，李庥安歇佇細漢Robert身邊。隔轉年，Eliza成做台灣第一位女宣教師，孤一人留佇遮，繼續佮主耶穌同工。
「願逐擺遭遇急難的時，恩慈、智慧和勇氣降臨，咱若無倒--落-來，就會繼續有收成。」—李庥