一生的承諾 醫生牧師謝緯的故事【台語故事線上聽】
點閱次數：650
一生的承諾
醫生牧師謝緯的故事
文江淑文
圖蔡兆倫
1
1924年，九歲的謝緯著重病，落尾煞顯奇蹟康復，伊的爸母用感恩的心，下願將伊奉獻予上帝。
毋過這个查埔囡仔對醫學也真有興趣，所以大漢了後，成做謝緯醫生，同時嘛是謝緯牧師。
2
23歲完成神學院教育的謝緯，到日本留學，佮意著仝款佇日本讀醫學的楊瓊英。
謝緯kā伊求婚，楊瓊英知影謝緯將來除了是一位醫生，嘛會是牧師，參伊鬥陣組織家庭會真辛苦。毋過伊猶是誠勇敢，講：「我、願、意!」
3
二次大戰了後，轉來台灣的謝緯，足無閒、足無閒、足無閒。
阿爸總攬創辦的大同病院，佇阿爸過身以後，負責的大兄煞閣來破病，需要謝緯接手。
毋但按呢，伊閣擔任教會的傳道師，後--來閣封立牧師。
謝緯常在一面看病，一面傳道理。
4
有一日，孫理蓮宣教師邀請謝緯，去部落kā原住民看病。
謝緯定定共家己的大同病院放咧，和醫療團同齊步輦上山義診。
一工愛看幾若百个患者，伊無感覺忝，顛倒因為kā人幫贊，得著滿滿的喜樂。
謝緯毋肯領醫療團予伊的補助，閣提家己病院的收入來贊助醫療團。
5
1951年，生活、工作攏已經穩定的謝緯，為著治療肺癆的病人，專工去美國進修胸膈外科手術。
這三年，佇台灣的楊瓊英閣再kā白袍穿起來，鬥發落大同病院，照顧謝緯的阿母佮規家伙仔。
禮拜日閣會招一寡蹛較遠、來做禮拜的人，來厝--裡食飯。
6
佇美國專心學習的謝緯，一直掛心台灣。
佇離開美國進前，伊用一年的時間，和人分享欲佇台灣設立山地肺病療養院的計畫。伊的分享感動誠濟人奉獻金錢，閣致使瑪喜樂決定來台灣服務。
7
對美國轉來台灣的謝緯，閣較無閒、痟無閒。
伊繼續協助南投教會，嘛關心附近的教會。
伊佇埔里用一間竹仔厝做基地，發展埔里基督教病院，看顧破病的原住民，嘛辦護理學校訓練專業的原住民護理人員。
後--來，由徐賓諾護理師和紀歐惠醫師來接手。
8
終其尾，肺病療養院佇埔里的鯉魚潭邊仔開辦矣。
頂真的謝緯邀請患者做伙來決定伙食的菜單，透過這个機會予患者知影營養平棒的重要，予in出院以後，繼續保持好習慣，減少病症復發。
9
1960年，孫理蓮宣教師閣邀請謝緯做伙到台南的北門，和王金河同齊醫治烏跤病人。
這兩位醫生，攏會親身「鼻」患者跤頂懸空喙的味，來幫贊in判斷病情。
孫理蓮、王金河和謝緯，成做醫治烏跤病的三跤㧣。
10
謝緯看著彰化二林沿海地區欠缺醫生，伊認為台灣的基督徒醫生已經會當獨立開設一間基督教病院，無應該直直咧倚靠外國宣教師。就按呢，伊號召眾基督徒醫生，同齊參與開辦二林基督教病院。
伊家己逐禮拜上無會去二林義診一改。
謝緯閣較無閒矣。
楊瓊英留守大同病院，予謝緯會當穩心仔佇外口走傱。
11
無閒chhih-chhih的謝緯若趕會轉--來，定著參加逐工暗時舉辦的家庭禮拜。
謝緯足gâu彈琴，定定佇家庭禮拜--裡司琴，逐家做伙彈琴、唱詩歌、讀經、祈禱。
佇客廳的桌頂有一台對講機，kā做禮拜的聲音，送對樓頂，予破病無才調落樓的謝緯的大兄聽，予伊相佮來參與禮拜。
謝緯逐擺出門轉來，攏會先kā阿母報告家己轉--來--矣，嘛會透過對講機kā樓頂的大兄請安。
12
謝緯的生活中強欲無時間歇睏。
這工，伊透早就出門去埔里看診。
中晝轉厝--裡食飯飽，又閣欲家己駛車趕去二林。
「你敢無欲歇--一下？」楊瓊英煩惱甲，共謝緯問。
「我減睏一寡，早到位一分鐘，病人就通減受苦一分鐘。」
忝頭的謝緯按呢kā應。
13
「你出門愛細膩。」楊瓊英講。
「你嘛是，厝--裡、囡仔、病院著拜託--你囉。」
謝緯講煞，閣趕緊駛車離開，趕後一个行程。