輸入關鍵字,並按enter進行搜尋

為愛走過一山又一山 胡文池牧師的故事【布農族語親子導讀】

點閱次數:135

cis'uni mas daidaz mudadaan sian ludun tu Husung bukusi


itu tamaHusung a ngaanan hai sian Bunun matumashing mas cis’uni Bunun kuzakuza tu胡文池bukusi tu sinpacingaan.

antala mas maisna dihanin tu vaang

1910 tu painsanan 4 buuan 28 tu hanian, Husung hai taus’uvaazun sian Sinpak tu Sincuang.

Husungan masa isian Tanciang kukiubu mapasnava hai, cis’uni mahanglas a lumah, at nanii tu malkaknu pasaukanahtung mapasnava mas saicia, tudiiphai nii saia maz’av kituhtuh mas itu kucusingsi tu ilav, at tahu mas isaicia tu iniliskinan, tudiip hai, tau’un a ilav mas Cialuilin kucusinsi, at siutai mas saicia, masaiv saicia mas iskuzakuza, at mahtu a saia mapasnava. 1931 tu painsanan, kudiip a Husung sian Taipak singkaku’iing mapasnava. Suun Iakubu bukusi a min’kucusingsi tudiip mamantuk tu aiza a paisnavaan, maisnasian Suun Iakubu bukusi tu sinungbangan, upasnavaan mas itu Tamadihanin tu hansiap siin taiklas, usaduan tumahtu a sinlatuza is’inhumis sia tahu sinpinaskal tu halingacin, at masnava mas takisilazan tu tais’aan, musasu sahusbu mas takisilazan, akasi mas Tamadihanin tu iskuzakuza.

mudaanin! maciskun kaimin tastu lumah mai’aupa mas insuman valicia

1947 tu painsanan tu talabal, tusing’avun a Husungan mas Suun Iakubu tu, adu mahtu kasu kusian mas insumas vali tu dalahcia tu Bunun tahu mas Tamadihanin tu halinga, madas naicia sahal mas Iesu. cis’uni tu laduaz a tastulumah hai, antala saia mas sin’tan’ali, isia na’ia mas Taka kiukai hai pisi’alun mas tais’an masatu, at patangus kusia mas Sincuang mapasadu mas tastu lumah, at mudan mai’aupa sian Taitu tu Kinalaungan. nalahaiban aip tu daan hai, minkuang i aupa bailivusan, maisisian naia mas Su’auu kusian Taitu tu Kinalaungan hai mastan tu talpataz, mahtu a sin’udadan tupau tu cis’uni mas natahu mas Tamadihnin tu halinga mastaan madaing tu aicisludan.

mavisik tu sinkuzakuza

laupang panasian Kinalaungan hai, uka a bunun sahaalan, napana’isa itu Husungtan tastulumah islunghu i? mais kusian ludun hai namakua mapasahaal takisilazan i?haitu, aiza a itu Tamadihanin sin’adas! aizaan a Kinalaungan mas tasa tu biu’iing, Ingtian.Huang(黃應添) ising hai liskaKilistu, pin'uniun saicia a tasa taluhanhalang mas u'ampukan, at ispakusia mas Husung bukusi, musasu tahu tu, islunghuan tu hanian, Bunun tu tais’aan mais minsuma mapa’iu hai, pavazun a sinpa’iu tu sui siza, kitngaap mu’anpuk mais cingmut tu cinmas’an tu mapavaaz, mais kanahtungin mu’anpuk hai aizaang a pinittaunghuvali. pahasia, mailantasa tu islunghuan hai, maciun tu mutda a madaingaz siin tasban mas’an tu uvaz a minsuma, nautu laupang hai, tan’ali a ising mas Bunun tu kanghuhu, malasBunun tahu mas itu Husung bukusi sintahu tu halinga. aipcinin ukiliman a ising mas tacini mataiklas tu Bunun, pacinganan saia mas taisis’aan tu Musia (Kinosita) singsi,saivan saia mas isingcia dustukubu tu bangkal pailas’uni isaicia tu sinkasui, tupaun a Musia (Kinosita) singsi tu laktanav a itu kisacu iskuzakuz, mindangaza mas Husung bukusi tahu itu Tamadihanin tu halinga, pakadazuan mas Husung bukusi malasBunun, masnava mas Husung bukusi malasBunun.

punpus’anin sian Kinalaungan hai, maku’uni a Husung bukusi mas 17 tu patasanLuma, mapinsia mas malasBunun isnanava tu ahil, mahtuin a dangian mas halinga, haitu ukaan mas patasan tu Bunun mapatas mas halinga, kiluku, ka’uni mas malasBunun tu isling anis is Matai sintahu sinpinaskal tu halinga. masa 1959 tu painsanan, dangian a Husung bukusi mas ilunghuan, at kusian Amilika mapasnava, mastaan saia sahusbu mas saitaan tu ispasnava, musuhisin a saia kusian Taiuan hai, macinsuu malasBunun mapatas mas bahlu sinpatumantuk tu patasan, masa 1973 tu painsanan pankanahtungin mapatas, sinkusia a zikaang hai 12 tu painsanan. asa amin a Tinsikiu makusia mas saitan tu Sesiu, at maskalun mas Bizuiti Sinbusang (Fr. Benz Titus), saia hai Zuisi kukka tu tais’aan.

pali’uni mas Husung bukusi kunling tais’aan tu na’iskalunan anis pinsalangka kiukai tu sinkuzakuza hai maupacin tu: masa 1949 tu painsanan hai, mailantasa Bunun mapasnava mas Tamadihanin tu halinga hai isian mas Kalingku tu Pushu ciulukiukai,masnava hai sasaspat tu bukusi, siamas Husung bukusi, Siancun.Luuk (駱先春) bukusi, Tiansun.Kaang (江天順) bukusi, Huiciung.Taan (陳惠昌) bukusi sinmas Asing.Cuu (朱阿生) ciulu, kitngaap kunling mas Bunun tu tais’aan, kitngaabin Bunun kana’anak tahu mas sinpinaskal tu halinga.

pun 10 in tu painsanan hai, pinduldulin a Bunun mas 50 tu kiukai sian Tai’uancin, sausian islunghuin a Husung bukusi, 60 in tu mutda a Bunun tu kiukai, tastumaang tu dustumasan in a liska Tama’dihanin, aiza’in a Bunun tu mapavaz liska Tamadihanin.

mastaan mahunduh tu aluszangan hai sia tastulumah

mais musuhis miliskin mas Husung bukusi tu sinkuzakuza sian tus’acin, mastaan kadimanun hai sia tastulumah sin’atuluskun siin sindangazngaz. masa 1935 tu painsanan hai, mapadangi a Husung bukusi mas Pu’iuk.Iap (葉寶玉) binanauaz, tupa saia tu, niitu ma’aipi mais mapitpung sinpinaskaltuhalinga, mastaan ma’aipi hai kana’anak taus’uvaaz,aizaan saia dadusa mabananaz anis a’apnuum maluspingaz tu uvaz. mastaan atumashaingun mas uvavaaz tu bunun hai sia mas inaicia tu tama, maisi’uvaz a naia muskun mas Husung bukusi minhumis, aluszangan kuzakuza tu taisis’an. Husung bukusi tu tacini Pu’iuk.Iapmastan tu kadimanun a iskuzakuza, Bunun isia mas pinduldul kiukai, ka’uni u’ampukan tu dailaz, mapising i niitu haiap mapatas anis pali’uni mas sui, niitu haiap tu namakua maldikus sintakbus tu sui, cis’uni maupacia, at itu taisis’aan sintatbus tu sui hai iskaunasian amin mas Pu’iuk.Iap maldikus. Bunun mais sadu Pu’iuk.Iap hai maszang tu sadu mas cina, aupa maszang saia cina tu mahatba, at madungdung a is’aang. kaupa tu buan mais isian a Husung bukusi ludun tasbanin tu talmasan uka sian lumah hai, ilumahin mastatala mas Husung bukusi siin malavi Husung bukusi kulumah tu Bunun, pisi’alun amim mas Pu’iuk.Iap saipuk. niang a Husung bukusi cinis’uni ilumah na’iskusia tu sui masalpu, aupa kana’anak saia matahis mas sikaupa uvaaz tu ulus, mapabaliv mas kai’anakan ka’uni tu kakaunun, is’indangaz mas itu lumah tu na’iskusia. at mahtu a Husung bukusi masaiv takisilazan tu tahuhalinga mas sui, aupa naia hai mahanglas, mais simul a naia mas sui hai niitu kinkinuzan tupa tu suhaisav.

islunghuin haitu maldaukan kuzakuza tu is’ihumis

mapatas a Husung bukusi mas patasan tu na’islunghu masa 1971 tu painsanan 8 tu buan, haitu maldauk saia mindangaz mas Bunun sian kiukai tu iskuzakuza sinmas pa’i’iu’an mas haikikaku, akitmatan kuzakuza hai Sanglav’auhsa tu dantai (芥菜種會) isian mas Kinalaungan haikikaku tu pa’i’iu’an, min’uni a Husung bukusi tu tacini mas itu “Mali’ia biu’iingsiliba” tu lavian, mas’an tu painsanan, takisilazan silibaun saicia tu uvaz hai tasbanimatumas’an. pankanahtung a Kinalaungan biu’iingsiliba tu iskuzakuza hai,pin’uniun mas Husung bukusicia maibiu’iing’an mas takisilazan isnanavan tu u’ampukan, saipuk kunata mapasnava tu takisilazan.

kanadan mas mailangna mapasnava tu sinlatuza

masa 1974 tu painsanan mai’aupa mas Kinalaung bukai tu Cuun’ih.Luu (盧俊義) bukusi, cinupa saia tu: “aiza tasa tu hanian, tan’aliun saikin mas Husung bukusi kusia mas haikikaku pa’i’iu’an, tudiipin saikin haiap tu, maluszang saia mas mihalang tu taisis’aan, mais nihai mapaliba mas naicia, mu’aisku saia sian sapalan, isian mas mindahpacia tu kanum ta’aza mas inaicia tu sin’palinutu, madas naicia pisvandu, maupacia tu sinkuzakuza, dangian mas madaidaz tu is’aang, tuza tu taivuhvuhun a inaak is’aang, paluszangun hai tuza tu maz’avdaingaz a is’aang, aupa kaupa hanian masalpu saikin tu mais ulan mas dahpacin.”

maszang mas Iung’un.Ting (鄭仰恩) bukusi isian tasatusinpatas, maku’uni mas “dangian mas kadimanun tu balukan” mapaluszang mas Husung bukusi tu sin’ihumis, itu Husung bukusi sikaupa tu aildikusan hai, itu Tamadihanin amin tu sinsaumazav,kaaz saia miliskin tu saikin hai itu Tamadihanin iskusiatu haimangsut, tastu is’ihumis hai cis’uni tahu mas sinpinaskal tu halinga, sausian mudaan nastucin.

kinuzin, tunaskal mas itu Husung bukusi tastupadangi tu uvaaz siin uvavaaz, tahu mas imu tu iniliskinan, muskun kuzakuza, ka’uni mas patasancin.