為愛走過一山又一山胡文池牧師的故事【台語故事線上聽】
點閱次數：1020為疼行過一山閣一山
胡文池牧師的故事
1947年熱--人，孫雅各牧師問胡文池牧師：「你敢願意去台灣東部，共Bunun族的人傳講福音？」
阮一家伙仔佇大甲蹛甲好勢好勢，孫雅各牧師邀請爸爸去台東的關山，共耶穌介紹予Bunun族的人熟似，閣翻譯Bunun族的聖經。阿爸講好、阿母嘛同意。
干焦阿媽著生驚，因為對彼當陣的人來講，台東佮月球平仔遠。
規路阮攏食人送的肉粽，就按呢對大甲坐火車去蘇澳。
肉粽呢！袂輸咧郊遊。
坐火車到蘇澳，欲盤巴士的時陣，才知影風颱比阮較早到位，共蘇花公路掃歹去矣。
阿爸去南方澳漁港，揣著一隻肯載阮去花蓮的漁船仔。恁毋通掠準阮坐船仔去東部，規路是㧣風搢水、兼欣賞船仔邊的海豬仔咧跳舞。其實阮坐的船仔足細隻的、拄著風湧足大的，規路搟甲足厲害，除了阿爸，阮逐家攏眩船，吐八點鐘才到花蓮。
*彼當陣無北迴鐵路，火車干焦駛到蘇澳。
到花蓮才發現風颱嘛共往關山的路掃斷去矣，阮祈禱了後，決定用步輦的去關山。
阿爸釘一隻柴車予第四、第五的坐。第二、第三的予阿母牽，大兄行佇上後尾。
第二工，大身大命的阿母行袂去矣，因為伊的腹肚底已經有第六的矣，阿爸就做一頂轎，倩人共阿母扛轎。
阮行三工，總算到關山。
佇關山的日子，阿爸逐個月攏愛去Bunun族的部落拜訪，一去就是十外工。阿爸無佇厝的時陣，干焦阿母佮阮做伴。
欲睏進前，伊會講故事予阮聽，故事內容予人足感動，阮攏聽甲目箍澹澹。
阮有眠床通睏，毋過阮會煩惱阿爸下暗毋知睏佇佗位？
阿爸捌共阮講，有當時仔為著趕路，in會佇路邊共草埔仔踏踏予平，就直接倒佇面頂睏。拄著有部落的所在，親切好客的原住民會請in入去厝內底，睏佇火爐頭前上燒烙的塗跤。主人的狗仔會倚來阿爸的胸前，親像保溫的火熥。有時陣，阿爸睏的眠床就架佇雞牢抑是豬牢頂，那睏那聽豬仔聲鼾鼾叫。
「你佇山頂攏食啥？」阮捌按呢問阿爸。
「原住民食啥，我就綴咧食啥！親像番薯、黍仔，有時陣臭風--去的山豬肉嘛食。」阿爸講：「紮的乾糧若食了矣，就佇上山的半路挽野果、野菜準飯頓，欲啉水就直接用開山刀剉樹藤，啉藤仔水止喙焦。」
「阿爸轉來矣！」
遠遠看著阿爸的人影，阮足歡喜的，目睭金金相。
愛等伊佇厝埕，先共愛哭愛綴路的小朋友──木虱、虼蚤──處理好勢，才會使共阮攬攬搭搭咧。伊嘛才會知影，伊無佇咧的時陣，阮啥人落喙齒、啥人會曉騎鐵馬矣。
「阿爸、阿爸！」阮共伊圍咧硞硞問：「這擺行偌遠的路？有啥物趣味的代誌無？」
有一擺阿爸足歡喜的，伊共阮講：「這擺村長足鬥相共的，伊鐘仔一下摃，村民就來村長的厝裡聚會。逐家攏聽甲興chhih-chhih，三暝三日無睏嘛無要緊，一直欲聽我講聖經的故事。我教村民唱聖詩，in嘛是規暝唱袂煞。」
閣有一擺，阿爸講，部落的警察予in佇派出所傳福音，警察閣去揣人來聽福音呢。
阿爸對山頂轉來的時陣，有一寡破病抑是需要伊幫贊的Bunun族原住民，會佮伊同齊落山。這个時陣，厝裡嘛已經有對另外一个山頭來的Bunun族人，咧等阿爸替in解決問題佮身軀頂的病疼，所以阿母會共椅條囥佇門跤口，予in坐咧歇睏，聽候醫生來治療。
轉到厝的阿爸定定嘛忝甲會呼雞袂歕火，著愛歇睏。毋過歇睏了後，會有老師來厝裡教伊Bunun族語。原來阿爸嘛愛讀冊喔！
你共斟酌聽，阿爸佇咧哼歌呢，原來伊閣愛上音樂課，才會了解Bunun族的八部合音。毋知影阿爸敢愛上體育課，敢愛佮Bunun族的人去走運動埕？
下課了後的阿爸愛寫功課，阮嘛想欲共簿仔掀開，佇阿爸的大塊冊桌仔頂陪伊寫作業，阿母總--是叫阮去外口chhit-thô，毋通共阿爸吵。
毋過阮恬恬咧寫功課，阿爸煞佮伊的Bunun語老師佮同伴，嗤舞嗤呲討論袂煞。
原來阿爸的作業就是佮伊的老師、同伴，做伙共聖經翻譯做Bunun語，予Bunun族的人會當用家己的語言讀聖經。
等阿爸功課寫好矣，伊會講:「阮來去外口耍！」
哇！欲耍啥物？
阮上捷去溪仔邊摸蜊仔。阿爸共摸來的蜊仔，豉鹹蜊仔，食著足開脾、足配會落飯的。彼工，阮逐个人攏閣加貯一碗飯。
有一擺，嘛是唯一的一擺，阿爸chhōa阮坐火車去水尾洗溫泉，路裡食的便當，是阿母攢的喔！
上帝予阿爸愛心佮耐心。以早，阿爸行過一山閣一山去傳講上帝的疼，就按呢福音傳遍山地一四界，信主的人足濟的，教會嘛一間一間佇山頂起起來！
這馬交通便利矣，車會使直接駛去到以早阿爸愛行幾若工的山頂。
這是阮阿爸的故事，疼惜阮、疼惜Bunun族的胡文池牧師。