輸入關鍵字,並按enter進行搜尋

姆姆為什麼不來看我?石仁愛修女的故事【台語故事線上聽】

點閱次數:616


姆姆哪會無來看--我?

──石仁愛修女的故事

1

「阿母,姆姆哪會無來看--我?」阿明問甲足著急--的:

「姆姆是毋是共我放袂記--矣?」

2

「乖囝,姆姆哪有可能共你放袂記?你看,你這馬坐的輪椅,

敢毋是姆姆去四界募款,買來予--你--的?」阿母共阿明的頭挲挲--咧。

阿明用扭曲變形的指頭仔,佇輪椅的手扞頂輕輕仔hôe來hôe去。

伊會記得輪椅送--來的彼一工,

雨足大,姆姆的靴管齊是漉糊仔糜。

姆姆掀開像金龜仔彼款青色的帆布,

銀色的輪椅佇黃黃暗暗的燈光下,像天星仝款閃閃爍。

3

阿母共阿明短短的頭毛挲挲--咧,講:「姆姆可能去東引共人抾囡仔。」

「但是,但是,阿母,姆姆已經五工無來看--我--矣。」

阿明一箍面懊嘟嘟,一句話講甲thi-thi-thu̍h-thu̍h。

阿母共阿明硬掙硬掙的肩胛頭搭搭--咧,講:「你看,你身軀的衫,

敢毋是姆姆送--的?姆姆哪有可能共你放袂記?」

阿明用已經勼--去的指頭仔搝家己身軀的衫,搝甲真食力,

這領衫是姆姆專工請人對台灣紮--來--的。

4

「姆姆以前逐工攏來看--我,是按怎這馬無欲來?伊一定是共我放袂記矣⋯⋯」阿明喉滇細聲仔講。

「欲五月節--矣,姆姆應該是去監獄看hia-ê偷渡的人。」阿明慢慢仔共阿母泡的牛奶啉完。

阿母那共伊的喙角拭拭--咧那講:「你啉的牛奶嘛是姆姆送--的,姆姆哪有可能共你放袂記?」

「著--啦,曹姆--仔前幾工過身--去,姆姆一定是去共祈禱、chhōa(𤆬)囡仔--矣。」

阿明擋袂牢,吼出聲:「我足想姆姆,我欲姆姆⋯⋯」

「乖囝,以前攏是姆姆來看--你,這擺阿母chhōa(𤆬)你去揣姆姆。」

5

阿母笠仔戴--咧,日頭咧曝,佇坎坎坷坷的石仔路,

輪椅捒甲真食力,沓沓仔向前行。阿母的汗一粒一粒

滴佇阿明的尻脊骿。

6

阿明用扭曲的指頭仔,下性命欲共額頭的汗拭掉。

「足燙,足燙,阿母,我的跤足燙的。」

阿母這馬才發現阿明蝹蜷(un-khûn)的跤盤,予日頭曝甲毋但紅閣腫。

「乖囝,咱去頭前的樹仔跤歇--一-下,好--無?」

「我欲姆姆,無欲歇睏。」

阿母用予汗水浸澹的面巾共阿明的跤包--咧,講:

「著,姆姆嘛是曝遐炎的日頭來看--咱啊!」

7

一陣燒熱的風飛沙,搧對阿明的面,

「足疼,足疼,阿母,風飛沙搧甲我足疼。」

阿母共阿明面--裡的沙仔掰掰--咧,溫柔仔講:

「姆姆嘛是坱著仝款的風飛沙來看--咱啊!」

8

路--裡有幾个囡仔那變虎貓,那對阿明大聲喝咻:「喙瀾明,愛哭鬼,無涼水,啉喙瀾。」

「啥物喙瀾明?恁咧烏白講啥?」

「阿水嬸,伊生成歪喙,喙角閣咧滴喙瀾,毋是喙瀾明,是啥?」

阿母氣甲想欲共抉--落-去,毋過,阿明共阿母的衫仔裾搝搝--咧,講:

「阿母,咱去揣姆姆⋯⋯」



9

阿母問阿明,敢會足氣彼陣共伊欺負的囡仔?

阿明講:「袂--啦。姆姆講--過,伊拄來馬祖的時陣,逐家誠罕得看著外國人,

攏毋敢佮伊講話,閣有人會共笑,姆姆攏袂受氣,我嘛欲佮姆姆仝款,莫受氣。」

10

來到足崎足崎的石坎仔跤。

「僥倖--矣,遮爾崎,輪椅欲按怎捒會起--去⋯⋯」

阿母對懸懸懸的石坎金金相,規身軀軟siô-siô,蝹佇石坎頂。

阿明佮阿母鬱卒甲。雄雄,阿母敢若去想著啥⋯⋯



11

「乖囝啊,咱會使學姆姆祈禱啊!」

「祈禱?你敢會曉?姆姆拜--的是外國神明,毋是媽祖喔!」

「乖囡仔,安--啦!綴阿母祈禱就著--矣!」

母仔囝兩个目睭瞌瞌,雙手合十,不止仔虔誠。

「姆姆信的上主啊,拜託--你,保庇阮順利揣著姆姆⋯⋯」

想袂到,猶未祈禱煞,就聽著後壁傳來跤步聲。



12

「恁有好--無?」

姆姆向腰,微微仔笑講:「我當欲去看--恁呢!」

阿明嘛嘛吼:「我⋯我⋯叫是姆姆⋯⋯無愛挃--我--矣!哇——」

13

阿明面牢沙,濫摻目屎、汗水,姆姆輕輕仔共阿明的喙䫌(phóe)唚--一-下,講:

「姆姆愛阿明,阿明是姆姆的心肝寶貝。」

彼陣創治阿明的囡仔驚惶甲四界喝咻:「大新聞,大新聞,姆姆唚喙瀾明!」

對彼工開始,無人敢閣共阿明恥笑,嘛無人閣欺負--伊--矣。

逐家攏知影,阿明是姆姆的心肝寶貝。