飛魚之島 達悟之父紀守常【達悟族語親子導讀】
點閱次數：391vilangan no malaina am malama
asa ka vahey
1919 nyan 3 ye 15 re am, matazak a tao si Sasagazo, ngaran na : si Alfred Giger, tinsiokio sira asa ka vahey. mina dindosi si ama na, komaro am, mangey mivazey do Ibingkiok. teymakdeng do kiokay si ina na. papito sira miketeketeh, tatlo sira o kaka na mahakey, raroa o wari na mahakey, asa si wari na mavakes.
no ka likey na pa ni Sasagazo am, naknakmen na rana o kangey na misinbosang. 1938 nyan am, komaro do pivatvatkan, kangey na do Paylenghwey a misinbosang. ikakza na o kangey na somidong so ji macingey do iciatatao da ipangoyongoyod da. teymakdeng o nakem na do mangasia tao.
Paylenghwey
Royse a Paylenghwey si Sasagazo, no ka 1895 nyan kangey na do 1921 nyan o nipatnekan da so siohwey da. "Paylenghwey" o nibnek a ngaran no siohwey da, paingen da do nikatazak a tao an ni Yeso do poliheng. a somidong so mangasi a tao do pikamahamahatawan na.
no ka pivatvatek ni Sasagazo
kapito a kawan a macinanao do icicirawat no sinbosang do kiokay, miratateng am, mangey do itaysang a kasa kawan. 1945 nyan 3 ye 25 re am, ipanlanlag da si Sasagazo a misinbosang, miratateng am, mangey macinanao do ciriciring no cyokok a kasa kawan.
tovoin da si Sasagazo a mangey do Talo, masarey a makateneng do kangey na do Talo, tana sira ina na ama na am, teymasarey sira makateneng do kangey na do Talo ni Sasagazo.
no keyan na do Peycing ka do Nipong
1946 nyan 6 ye 18 re, makasesnad sira Sasagazo do Talo do Peycing, ji da amya sira mangey do Tongpey do Cicihaar, ta noka nonang am, masiahahap sira o cyokok, ka to da ngianan do Peycing, a macinanaodo ciriciring no cyokok, tarek o ka livolivon da mey limwang no voin ni ama ta do to. masanib si Sasagazo a mangey manangangey no mangasia tao do dang.
1952 nyan 12 ye 14 re, vozwawen da no cyokok sira sinbosang a tovoin da do Talo. kangey da someypat do Siang Kang, miratateng am, mangey do Nipong si Sasagazo a macinanao do ciriciring no Nipong.
mey limwang no voin do Pongso
1954 nyan am, mangey si Sasagazo do Takaw a miwalam aka pinozi na so adoa ka neyciyo , am, jia nimakman sang, ta nimangey mavang do avang a mangey do Pongso, ka palolo na so anem a lavat a ayob, nimacipinda no kanonang o jinagiji no ipakarala na kanekanen, am ayob sira, a itoro na do Tao do Pongso, abo o akman sia tey maglow no Tao, ori o abnekan da sia"Ama no Tao", yatongai siciaikoa ya o da pancian nia iniapoan no Tao do Pongso.
anem a kawan so ipitoyay so awawan o niyan na do Pongso ni Sasagazo.
pakamotdaen da no cyokok o Tao do Pongso, palamen da o baka da do hahakawan no Tao, ori o mangey naipacingasangas do cyokokam mikalsong a masi no tao. maniring rana o kakteh na mavakes a si Agnes am: "apyahen na o kangey no inawan na, a macirawarawa no Tao do Pongso." o nakem na so Tao do Pongso ni Sasagazo am, da pavitavitawen (銘記) do onowned da no Tao do Pongso.
panaralayan kano icicirawat no Tao
mangey do Pongso si Sasagazo am, ji na balinasa o icicirawat no Tao, ta katenngan na sira omraraley no tao do to a ipanci da "akey do langarahen", miyangey kano iraraley da do kiokay a tao do to, ori o jina zazaci do sinjia mipazos ni Sasagazo.
no amyan do Pongso aka pacisarow na do ipamaring da so kanen no Tao am, mangey macikaopjira minozi nira asa keyli, mangey do vinviney da am hahakawan da, pangahahapan da o ipinozi ni Sasagazo.
no amyan si Sasagazo do Pongso a keyyan no mawakwak a tao am, mangey macisakasakey jira, tona maciozai o dindosi na omonong do iweywawalam da no Tao do Pongso.
pakatkatan so Tao
rarahen na o mateteneng a kakanakan a mangey mivatvatek do Ilaod, am ji da novoya no kaniapoanan da o minapodpod jira mangey mivatvatek do Ilaod, ori o ikazikna ni Sasagazo a amlivolivon do pikeylilian na, macisirisiring do kaniapoanan da.
ji dahap o siking da do pivatvatekan no nirara ni Sasagazo a kanakan do Pongso, ori o ipikala na so amnanao sira so kasa kawan, o ipivatvatek da kano kanen da am ayob da, am makakadey am, mamimin a si Sasagazo o tomoro jia.
no makarala do Pongso si Sasagazo am, ioya no kaniapoanan da, a manci no kalas no ciring na, avain da pacilimanan, am ji ngindok si Sasagazo. a no mangey rana do Taito a tomita so mivatvatek a kakanakan am, amlavi sira mapow no kaniapoanan da a, kagkaglawen na sira powringen.
ikasi na sira am, to rana manazang so patotoongan a mapatoong so izezyak no kaniapoanan da, no mangey rana do Taito am, pamizingen na do minapodpod jira, ka patoong na so izezyak no kakanakan, a ipamizingen na so kaniapoanan da a.
no miweywalam sira do pivatvatekan o kakanakan am, manazang si Sasagazo so vonongen na jira meykamadadey a warawara a isinmo da so kaniapoanan da.
paiten na sira makdeng a mivatvatek ka piya no siking da, ipeypakatkat da no makoa. ano ji da ahap o siking da, am macita na sira mitabako am, ioya na sira sipsipzotan ni Sasagazo, maniring siapen kotan a Mapahap am: " katenngan ni Sasagazo o siking ko do pivatvatekan a marahet am, ji nimizezyak rana ka bakbak na jiaken a sipsipzotan".
ya rana mitatalahatow siciaikoa ya do Pongso o minazikzikna na. o nimanoma niparahan na ni Sasagazo am, sira rana niomhat a nimapivatvatek, am nimivazey do mikamadadey a vazavazey do Seyvo..
oyowyat na ya ni Sasagazo o da nipipakatkat so pimeymasowdan da, inaoy a inarahen ta kamo o pangangarilawan na so tao ni ama ta si Sasagazo.
Pakakasahen
1970 nyan 3 ye 9 re do mahep am, tatlo sira o malavayo a mavakes do Loye a yangey ni Sasagazo do Taipei a macinanao do mikamadadey a vazavazey. apo sira Sasagazo do Taito a mavang do rako a aleleh a mangey do Takaw, kavang da do cicengce a aleleh, mangey do Ciai, miliktow sira do Tainan am, toknozen na no aleleh da o rako a kayo do siri no rarahan, 3 ye 10 re am, karwan na o karawan ni Sasagazo.
mamizing no Tao do Pongso am, amzozong sira mangey do kiokay a omlavi jia, ji da nganoyongi si Sasagazo a nikomaro rana jira. pakakasaen da si Sasagazo am, paloslosen da o katta da no cyokok do pakanakman da si Sasagazo a teymaglow no Tao do Pongso.
1992 nyan am, peylisen da o aseb ni Sasagazo a angey do Siawma, ori o na yanan rana no aseb ni Sasagazo, ya tongai si ciaikoaya o na jiazavaci no ariarilow na so Tao do Pongso.
no maniring si Yeso do seysio am: "no si jimoa do tana o vottow am, ji lida ori a miyasi, no si bobo do tana ori am ori o ilida na, ipalasi na so mikalailaid a asi na." (Yoani十二: 24)
niminda no ka karo na do karawan ni Sasagazo, o da nipakateneng rana jia no Tao do Pongso, so minavazavazey na, o nipipahagnat na a tao do Pongso am, da nipatnek so cicinhwey na, a da amoonan so minavazavazey ni Sasagazo, inaoy no to miyonong ya do kaidan no karawan o inaran da so pangangarilawan na so tao ni Sasagazo.