一、二、三、四、五，
數字藏有奇妙的祝福，
親像洘旱時有雨水對天頂降落，
斟酌體會就通了解其中的鋩角。
我的五福叔公，
就是上好的證明。
五福叔公佇兄弟中排第五，
自細漢就佮意和書做伙。
伊五歲就綴兄姊去學校，
因為爸母愛做生理，無人照顧。
學校有書通讀，有同學做伙𨑨迌，
回答老師的問題有著，閣有一寡獎勵，
細漢叔公逐工攏歡頭喜面。
伊上佮意學校的藍老師，
因為藍老師真畫圖，閣較gâu講故事。
「我看過飛船，有五个運動埕遐爾大！」
伊那講那畫。逐家攏聽甲目睭展甲大仔大蕊！
老師鼓勵 in 加讀書，
所以一下歇熱，細漢叔公就借五十本書。
「一工一本，拄拄仔好！」
伊逐工讀啊讀，定定袂記得食飯洗身軀。
阿兄共笑：「阿福看書就會飽。」
五福叔公自細漢就比人較gâu，
頭腦嘛比別人精光，
學業成績攏是排頭幾名的。
彼當陣會當讀到高等學校，
已經是真無簡單的成就，
毋過五福叔公閣想欲繼續提升。
伊進入台北帝國大學，
閣選擇足歹讀的醫學。
因為叔公講：「我愛成做台灣的史懷哲！」
史懷哲是德國了不起的醫生，
伊共一生攏獻予非洲人，
予破病的人著得健康，
為散赤受苦的人揣著向望。
伊成做五福叔公一生的好𤆬頭。
五福叔公的心志堅定，
就算戰爭爆發、阿兄過身、老爸重病，
暗時燈火管制，糧食嚴重欠缺，
攏無法度阻擋伊。
一禮拜有七工，
伊逐工攏佇學校、病院學習佮操練，
一口氣都無通歇喘。
五福叔公提早畢業，
轉去到家鄉行醫執業。
伊幫助患者通看清楚，
嘛予 in 的目睭袂閣痛苦。
「五福眼科」成做村民的祝福。
看袂著的人就算性命失去光明，
叔公嘛無愛 in 放棄希望。
伊成立「慕光盲人福利館」，
共學生當做家己的囡仔，
請老師教 in 調鋼琴的音、
掠龍、針灸佮點字，
予 in 有法度做工課，
靠家己生活。
五福叔公定定滾笑講，伊的一生，
雖然無共「福祿財子壽」一網打盡，
毋過也算「五福臨門」：伊五歲就通去讀書，
是醫學院第五屆畢業，
有五个囡仔，
五个查某孫佮五个查埔孫，
伊閣動過五擺手術，
逐遍攏受上帝眷顧。
數字真正藏有奇妙的祝福，
五福叔公的人生，
毋但五福臨門，也五彩繽紛。
伊領受祝福，嘛祝福別人。
我講，這是因為叔公的阿爸予伊一个好名字，
阿母講，若真正是按呢，
我閣較應該掠五福叔公做我的好𤆬頭，
因為我的名號做——
萬福。