亨德的那杯水【台語故事線上聽】
點閱次數：1274亨德教授逐工早起指導學生上勞作課進前，攏會先啉一杯水。
一杯清氣的水，看--來無啥特別，著無?
毋過佇學校外口就毋是按呢矣！
東海大學閣起去是大肚山頂，遐的庄頭分佈佇直直的稜線兩爿。山頂真欠水，因為地形的關係，嘛真歹收集雨水。
亨德教授總會看著作穡人咧趕載大柴箍的牛車，到校門外口垃圾的圳溝上水（chhiūⁿ-chúi）。
亨德教授真好玄就綴怹行去山頂，看怹共水倒入去庄仔內唯一的水池。全庄的人洗身軀、作田、飼精牲，就攏靠遮的水。
水池內嘛有鴨仔咧泅水，牛、豬、雞佮狗仔攏佇邊仔啉水，屎尿嘛直接流去水裡。天氣燒熱的時陣，囡仔嘛會跳落去耍水。
亨德教授真著驚，這水閣有影真垃圾（lah-sap）！
村長𤆬亨德教授去看村民提來啉的鼓井。怹排隊準備上水（chhiūⁿ-chúi），村長就問排佇上頭前的人講，敢會使先予伊上（chhiūⁿ）一桶水，好轉去燃茶予人客啉？
隊伍中，傳來一个阿媽真忝的聲音，抗議講：
「毋通--啦！我嘛等足久--矣，孫閣佇厝--裡等我捾水轉--去，煮飯予怹食呢。」
亨德教授聽--著，感覺真歹勢。
總算等到村長上水（chhiūⁿ-chúi），轉--去，伊真熱情燃（hiâⁿ）水招待人客。
毋過這水有一个怪味，而且苦閣澀，實在真歹啉。
亨德教授猶是忍（lún）咧，共伊啉了。
日頭聊聊仔落山，外口傳來一陣一陣的鑼鼓聲，村長招呼亨德教授做伙去看戲。
「是啥物戲？」亨德教授真好玄。
「是蠓仔戲啊！」村長講，庄仔內蠓仔濟，逐年著愛搬一齣戲予怹看，予蠓仔歡喜，叫怹莫來叮村民。
亨德教授心內想，共環境摒掃清氣，才是共蠓趕走上好的方法啊！
啉一杯清氣的水，水道頭捘（chūn）--開就有矣！
這佇東海這種清氣整齊的所在，是偌仔自然的代誌。
「欲按怎做，才會當予咱山頂的厝邊嘛過仝款的生活？」看著當咧上勞作課摒掃校園的學生，亨德教授心中一直咧拍算。
佇亨德教授對伊指導的學生講，應該為咱的厝邊做一寡代誌的時，學生的反應是：「彼有啥問題，阮就一路對東海校園掃到圍牆外口，閣掃起去，掃到山頂去。」
亨德教授聽怹按呢講，笑甲真歡喜。
遮的大漢囡仔，毋但綴亨德教授到大肚山山頂的庄頭摒掃，閣愈做愈濟，怹有人負責搭豬牢（ti-tiâu）、挖排水溝，有的人鬥相共清運廢塗佮糞埽。
一開始，村民毋知怹咧創啥，干焦佇邊仔咧看。
天暗矣，遮的大漢囡仔無隨轉去，閣佇原底搬蠓仔戲的廟埕，放環境衛生、預防病症的影片予村民看。
有一个學生大聲解說：「只要摒掃清氣，就無蠓蟲；啉的水清氣，就無寄生蟲，皮膚嘛袂遮癢遐癢，逐工咧抓。環境改善矣，雞、鴨、豬、牛攏會使共飼甲肥肥肥，賣著好價數，囡仔通健康大漢，老人老康健，逐家的日子嘛會較好過。」
村民聽了，攏一直頕頭（tàm-thâu）。
沓沓仔，村民願意佮東海的學生做伙摒掃，最後，怹全部家己來。
庄頭變清氣矣，毋過上根本的水源問題愛按怎解決咧？
這回，東海大學的教授和建築系的學生嘛來鬥相共，逐家做伙想出一套簡單接水道水的方法，怹用亨德教授捐出來的退休金，閣有村民做伙募款的錢，佇大肚山山跤挖一个水井，用mòo-tah共水送去山頂，才用水管接去每一戶厝內。
啊，有水矣～
現此時，蹛佇大肚山頂的人佮亨德教授、東海的師生仝款，攏會使享受清氣的水矣。
亨德教授笑笑講──感謝上帝，這擺我會當放心來退休矣。