孫理蓮心中的小喜樂【台語故事線上聽】
點閱次數：1335孫理蓮心中的小喜樂
1
啊！是喜樂是--毋？ 這囡仔已經遮大漢矣，真好。哈哈哈！
我是按怎熟似喜樂和伊老母--咧？ 講--起-來是真奇妙。
2
我號做孫理蓮，佇美國出世大漢。
足濟年前，孫雅各佮我對神學院畢業了後就隨結婚，坐船過太平洋，來到台灣。阮想欲共耶穌的福音傳予台灣人。
雅各佮我學台語了，就佇台灣工作。伊是神學院的院長，嘛定定四界去講道。啊我是定期去山地、病院佮監獄行踏，共病人揣醫生、共孤兒揣家。
拄著喜樂的彼工，我和做伙工作的戴爾醫生去監獄內，為犯人看病。
轉--來的路--裡，戴爾醫生共目鏡剝--落-來，兩蕊目睭已經欲瞌--起-來--矣。毋過，佇阮經過一間孤兒院的時陣，我雄雄感覺心臟跳甲誠厲害，敢若欲對胸坎跳--出-來按呢。
「戴爾醫生，閣參我去孤兒院看看--咧好--無？」我問。
醫生共目鏡掛--起-來，手微微仔掣，寬寬仔講：「一定愛今仔日喔？」
「是，我心肝內有一種歹吉兆。」我應。
「若按呢好！」 醫生有寡無奈--的頕頭。
3
孤兒院塗跤的磚仔，踏起來小可黏黏、滑滑。我共目睭眯（bî）--leh，毋過看袂清家己踏著啥物。
牆邊的烏影--裡，有幾若个囡仔，用一對一對烏烏的目睭掠阮金金相。我共擛手，煞無人應，逐个囡仔攏一个憂頭結面。
我佮戴爾醫師行向後壁，來到一間暗趖趖的嬰仔間。
嬰仔間內底充滿臭味，每一張眠床攏足垃圾，敢若真久無人共紅嬰仔換尿苴仔--矣。
「戴爾醫師，遮-的紅嬰仔若像攏破病--矣！」 我摸囡仔的頭殼額仔，全咧發燒！
醫生煞講：「理蓮，咱無法度救每一个。」
我叫家己小忍--的，等待醫生一个一个斟酌檢查，用聽診器貼佇紅嬰仔細細仔的胸坎。最後，伊徛佇一張床邊，攑頭共我看，目頭結結，肩胛頭放--落-來。
「怎樣--矣？」我趕緊問。
「這个囡仔袂活過今暗。」醫生聲音低低--的講。
「袂用--得！咱著共救！」 我共紅嬰仔抱--起-來，衝去馬偕病院。
4
佇馬偕病院，醫生佮護士共這个紅嬰仔照顧甲真細膩。伊一工重過一工，嘛開始有笑容，漸漸仔較有活力。
總算，醫生講這个紅嬰仔會使出院--矣！
毋過，我煞收著孤兒院院長寄來的一張批，批頂寫講這个紅嬰仔是癩疙病患者的囡仔，孤兒院無閣收留伊的意願。
欲按怎--咧？就𤆬伊轉來阮兜！
轉來到厝前，雅各看著我胸前抱一个紅嬰兒，目眉動--一-下，啥都無問。伊激五仁用一个小鬼面，弄甲紅嬰仔笑袂停。
「這个囡仔就蹛咱兜，好--無？」我問。
雅各微目（bui-ba̍k），真溫柔講：「咱的囡仔萬福佮瑪麗安攏大漢離開厝--矣。這个古錐的紅嬰仔來了誠著時，予厝內底閣充滿喜樂！」
自按呢，阮共伊號做──「喜樂」。
5
我有倩一个奶母，佇我出門做工課的時陣來厝--裡照顧喜樂。看怹兩个漸漸熟似了後，我恬恬仔越頭，行出大門。
無想--著，才拄離開厝，奶母就抱喜樂追--出-來，那喘那講： 「牧師娘！這个囡仔頷仔頸後有一塊紅斑，敢是癩疙病？」
我看著彼塊紅斑，淡薄仔操煩，趕緊叫戴爾醫生來檢查。
醫生微目（bui-ba̍k）、結目頭，檢查一陣仔，總算開喙講： 「這塊是胎記，大漢就會變淺--矣。」
阮逐家心頭的重擔攏放--落。
奶母抱喜樂轉去厝--裡，我就緊起跤走，趕去收容癩疙病患者的療養院。
6
佇療養院內底，癩疙病人袂使自由出入。有的人感覺日子真無趣味，有的人足數念厝內的人，嘛有人一句話都無愛講，規工鬱卒無元氣。
誠濟人會驚癩疙病，掠做彼是無藥通醫的絕症。其實，病人若是照時間食藥，就會慢慢仔利流。而且，大部份的人袂受感染。親像我，定定出入病院，嘛無予人傳染。
我定期來到病院探望病人。逐擺去就是和怹做伙唱詩歌、祈禱，嘛想欲共耶穌的故事講予怹聽。怹感覺真心適，就開始較有笑面，嘛倚過來參我講怹的故事。
7
其中，有一个名叫阿寧的新病人，拄入院無偌久。伊講，幾個月進前，伊有生一个囡仔。生囝的過程誠順利，查某囝嘛真健康。毋過，醫生發現伊身軀頂有略仔紅紅的癩疙斑，共伊送入來療養院。
無偌久，阿寧的翁婿就無--去--矣！怹失去聯絡，啊伊予人關佇療養院內底，干焦知影查某囝入去孤兒院。
講到遮，阿寧若像足絕望的款，問講：「最近，孤兒院嘛失聯--矣。囡仔敢是死--去--矣？」
我想起孤兒院遐可憐的囡仔，問講：「恁查某囝生做啥物模樣？有啥物無仝的所在--無？」
「伊頷仔頸後壁有一塊無偌大的紅色的胎記。」阿寧回答。
「胎記！？」我兩蕊目睭展大蕊，緊共問講：「伊予人送去佗一間孤兒院？啥物時陣入去--的？」
阿寧那回答、那哭，愈哭愈厲害。
8
我是那聽、那想，愈來愈會當確定：阿寧的查某囝就是小喜樂！
我共阿寧的肩胛頭搭搭--咧，歡喜宣布： 「阿寧，恁查某囝現此時就佇阮兜！」阿寧喙開開，目屎一下仔齊停--落-來！
「放心養身體，囡仔交予我照顧！」我講。
9
另外一對癩疙病人嘛共怹雙生仔的紅嬰仔託--我。遮的囡仔袂當和爸母做伙蹛佇病院，嘛無孤兒院欲收。
愈來愈濟無厝通轉去的囡仔，毋過阮兜已經蹛袂落--矣！而且，我佮雅各閣收著長官的警告：「毋准一直收飼囡仔，趕緊共怹送走！」
我實在想袂出辦法，只好佇祈禱中問： 「主啊！你欲予囡仔蹛佇佗位啊？」
隔工暗暝，我和雅各當欲上眠床歇睏。門鈴煞雄雄咧叫。「遮晏--矣，閣是啥人？」雅各那問，那行去應門。
原來，訪客是一个名叫William Robert的美國人。伊是牧師，嘛是廣播主持人。Robert感覺歹勢，遮爾晏才來拜訪，毋過伊專工來亞洲，想欲了解宣教師的工課。
我佮雅各一點仔嘛袂感覺予人攪擾！會當和這个意外的訪客用家鄉的話開講，感覺誠親切。阮分享真濟佇台灣宣教的心適代，嘛講出阮的困擾：癩疙病人的囡仔需要一个家。
10
兩禮拜了後，Robert牧師拍一張電報予--我，頂懸按呢寫：
「電台播出恁的故事了後，收著真濟捐款，指名捐予『Formosa島嶼，癩疙病人的囡仔』。雅各和理蓮，遮有附美金兩千五百箍，著起一个“家”予癩疙病人的囡仔蹛！」
我用逐家的捐款買土地，起一棟真大的厝。
桌仔、椅仔、眠床、佮chhit-thô物仔，一項一項搬--入-去，癩疙病人的囡仔嘛一个一个搬--入-來。遮自按呢成做囡仔的「安樂之家」。
11
每過一站仔，我就請攝影師為安樂之家的囡仔翕相。蹛院中的爸母看著囡仔健康大漢，就會當安心養身體。
無偌久了後，阿寧利流--矣。伊離開癩疙病院，參小喜樂做伙搬入來阮的「婦女之家」。佇遐學習轉去社會的技能，嘛慢慢適應新的生活 。
準備半年了，阿寧和喜樂總算通離開婦女之家，出去家己生活--矣。
欲離開進前，我特別交代阿寧： 「千萬莫予別人知影你捌著過癩疙病！以後，就算佇路--裡拄著我，嘛毋通相認，知--無？」
12
蹛過癩疙病院的人，常常會佇外口予人排斥、恥笑。我無希望阿寧佮喜樂予人欺負，所以才講袂當相認。
阿寧無應話，干焦恬恬仔流目屎。
「上帝會照顧--恁，嘛會照顧--我啊！」我講。
阿寧聽了就笑--矣。
13
有一日暗頭仔，我當欲轉去厝。無想--著，佇路--裡拄著阿寧佮喜樂！我趕緊使一下目尾，假影無熟似。
喜樂應該袂記得我矣乎？毋過伊一直對我笑。
「小喜樂，咱無熟似啊！知--無？」
喜樂啊，喜樂！ 看著你，我的心肝一下仔就充滿喜樂！
恁講，上帝是毋是真奇妙？
註：『痲瘋病』，台語名：癩疙病（thái-ko-pēnn）、雞爪瘋（ke-jiáu-hong）。